الطفل اللي في الصورة دي اسمه "فام مينا صفوت"، وعنده 12 سنة.. من صغره وهو بيحب يكسر الألعاب بتاعته عشان يستخرج منها الأجهزة الداخلية بتاعتها ويحاول يركبها تاني من أول وجديد وعشان يعرف طريقة عملها إيه.. والده لما لاحظ ده قرر يدخله في واحد من المراكز العلمية في سوهاج عشان يطور من نفسه وبالفعل كانت الخطوة دي ليها دور في تنمية عقل "فام"..
"فام" لما شاف علامات التعب والإرهاق اللي على وشوش والده وجده وهما بيبذروا البذور في الأرض الزراعية بتاعتهم قرر يساعدهم من خلال تنفيذ فكرة تصميم جهاز يعمل هو الدور ده بدالهم!..
بيقول "فام" في حوار مع الصحفية "شيماء مختار": (الزراعة أهم شيء في مصر، الناس كلها عايشة عليها، وأنا فكرت في حاجة أخفف بيها معاناة والدي وجدي ومفيدة للجميع).. والنتيجة؟.. تصميم عبارة عن عربية صغيرة بتمشي في الأرض وشبه لعبة الأطفال وأثناء سيرها بترمي البذور في الأرض على نسق متساوي ومتوازي!.. العربية بتشتغل ببطاريات ريموت كمان!..
بيقول "فام" عن مشروعه: (برمجت العربية عن طريق تقنية الاستشعار عن بعد، والبرمجة كانت على كذا خطوة منها فتح الباب الخاص بالبذور وبذرها، والجهاز مزود بمنظار للوقوف في حال وجود جسم قدامه.. بحط البذور في الخانة المخصصة ليها، وعن طريق جهاز صغير للتحكم كل ما بتمشي كام خطوة)..
العظيم في الموضوع كمان إن أساتذة "فام" في المدرسة كانوا سعيدين بيه جداً لدرجة إنهم شجعوه يشترك في مسابقة على مستوى الجمهورية وفاز بالمركز الأول عن اختراعه في معرض القاهرة الدولي السابع للابتكار..
طفل جميل وعبقري زى ملايين المصريين اللي عقولهم تستحق تتوزن بالدهب.
