أحمد زويل كان بيهدم نظرياتهم الشعبوية عن "من زرع حصد" + "من جد وجد" + "استمرارية السعي تقتضي حتمية الوصول" وشغل التنمية البشرية ده وكمان كلام زي اللي قالته الموديل الذكية العبقرية اللي نجحت بقانون الجذب وعلوم الطاقة مش شكلها و علاقاتها و اجوازها الاثرياء
. .زويل تكلم في مقابل مبدأ آخر عن أن النجاح محتاج بيئة تدعم اللي بيسعى للنجاح ده.
بدون البيئة دي السعي والعدم سواء.
والاستثناء خارج المبدأ ده لا يقاس عليه.
في كتابه الفريد (عصر العلم) زويل بيوصف الاوضة اللي المفترض تكون مكتب أستاذه د. سمير العزبي اللي لسه كان راجع من بعثة لأمريكا، وقتها زويل كان لسه معيد في علوم اسكندريه وبيوصف المكتب اللي الجامعة خصصته لأستاذه "كانت حجرة بالغة القذارة يصعب تصورها، كانت مخزناً للمهملات واتخذتها القوارض ملاذاً لها، قمنا بتنظيفها وحشرنا فيها مكتب _لدكتور سمير_ وكرسيين!".
ولأنه ارتبط بأساتذته في علوم اسكندريه (دكتور سمير ورأفت ويحيى) اللي سافروا ودرسوا في أمريكا في جامعات بنسلڤانيا ويوتا وغيرها .. ده شجعه يبدأ في إجراءات السفر واستكمال دراسته في أمريكا.
دكتور سمير ورأفت ويحيى التلاتة كتبوا توصيات تزكية لدكتور زويل بعد استكماله طلبات الحصول على الماچيستير من علوم اسكندريه سنة ٨٦ ..
وصل خطاب لزويل في أبريل سنة ١٩٦٩ من جامعة بنسلفانيا في فيلاديلفيا، وفيه: "توصي لجنة الدراسات العليا في قسم الكيمياء بالجامعة بقبولك، على أن تبدأ الدراسة في ٢٥ أغسطس من سنة ١٩٦٩"
بيوصف دكتور احمد زويل لحظات قرأته الجواب ده بأن مشاعره اهتزت وهو ماسك الجواب لأنه زي ما بيقول... أصبح على وشك الدراسة في أعظم مختبرات وأعظم جامعات في العالم.
خطاب جامعة بنسلفانيا كان ممضي ب إسم دكتور دونالد فتس نائب رئيس قسم الكيمياء في الجامعة .. والمفاجأة اللي كانت في انتظار د. زويل أن الجواب كان فيه إعفاء كامل من أي مصاريف دراسية.
مش بس كدا، الجامعة كمان هتدفع له مصروف سنوي بقيمة ٢٧٠٠ دولار، ده وقتها رقم محترم جدا في سنة كاملة.
مش بس كدا، من ضمن باقة المعجزات في جواب الجامعة للشاب المجتهد النابغة أول دفعته القادم من دمنهور ثم الاسكندرية .. من ضمن الباقة دي مصروفات إضافية تتحملها الجامعة عن البحوث الصيفية، وان طالما انت بتدرس عندنا المنح دي لن تنقطع يا دكتور احمد.
دكتور احمد زويل بيقول في مذكراته أنه قرأ الجواب ده ١٢ مرة .. قال كنت مستعد اسافر حالا وابدأ اجهز نفسي لكن للأسف كان فيه قواعد جامعيه في مصر مينفعش اسافر بعد الماجستير إلا بعد انقضاء سنتين بالتمام والكمال.
بيقول أن اللي غاظه هو أن المنحة الأمريكية دي مدفوعة بالكامل ومش هتكلف الحكومة المصرية أي حاجة يبقى ليه مسافرش دلوقت؟
واتكلم عن بيئة البيروقراطية في مصر اللي بتقتل فرص النجاح.
كان فيه مفاجأة أغبى من كدا في انتظار د. زويل .. في قسم كيمياء جامعة اسكندريه قالوا له الجواب ده كأنه مجاش .. دكتور زويل كان هيتجنن .. شرحوله بكل بساطة أن لوائح الجامعة مفيهاش أي حاجة تتعلق ب "المنح الشخصية المباشرة" .. مرفوض أن جامعة بنسلفانيا تبعت خطاب ب اسمك انت، هي تبعته من جامعة بنسلفانيا لجامعة اسكندريه واحنا نقرر نشوف بقى مين يطلع المنحة دي!
د. زويل بقى في ورطة عجيبة وقدام أزمة من لاشئ .. على رأي المثل أنا راضي وأبوها راضي مالك بينا يا قاضي .. جامعة بنسلفانيا ودكتور احمد زويل مع نفسهم وافقوا وزي الفل .. لكن التاتش المصري الأصيل بقى.
دكتور احمد زويل بعت يشرح أبعاد الأزمة لدكتور روبن المشرف عليه لما يوصل أمريكا، د. روبن تفهم البيروقراطية المصرية الجميلة ووافق وقال له هبعت ماشي الجواب من جامعة بنسلفانيا لجامعة اسكندريه لكن لازم تفهمهم أن المنحة دي احنا وافقنا عليها بعد مراسلات متبادلة علشان طالب اسمه احمد زويل .. وأي ترشيح لحد تاني هيكون مرفوض "ويتم إلغاء المنحة".
بعد كدا قلبت كوميديا. . دكتور زويل راح لواحد واحد من أوائل الدفعة في قسم كيمياء علوم اسكندرية يشرح لهم الموقف عشان ياخد تنازل مكتوب من واحد واحد فيهم أنهم متنازلين عن المنحة دي عشان يكون قدام إدارة كلية علوم اسكندريه وجامعة اسكندرية أن واحد بس من أوائل الدفعة اللي تروح له المنحة.
بعد ما أخد د. زويل كل المستندات راح بيها مبنى إدارة جامعة اسكندرية في الشاطبي ..
في الدور الأول قابله موظف اسمه محمود هو المسؤول عن تسليم بريد الجامعة، وقاله د. احمد زويل أنه معيد في قسم كيمياء جامعة اسكندريه وعايز يقابل رئيس الجامعة عشان كذا كذا .. بيحكي دكتور احمد أن محمود ده لما سمعه فضل يضحك وقاله: "انت فاكر أي حد كدا يقدر يقابل رئيس الجامعة بالبساطة دي؟"
وبعد طلوع الروح محمود ده خد زويل يطلع معاه للدور التاني وخلى د. زويل يشيل الكيس اللي فيه كل الجوابات اللي جاية مكتب رئيس الجامعة اللي مكنش موجود في مكتبه كان مسافر.
وقتها كان نائب رئيس الجامعة هو اللي قابل زويل اللي شرح للمرة الألف بس المرة دي لنائب رئيس الجامعة أنه معيد في قسم كيمياء جامعة اسكندريه وخد تقدير امتياز مع مرتبة الشرف وان المنحة دي مجانية لا هتكلف الجامعة ولا الحكومة أي شلن وان خلال شهرين لو مسافرتش تنتهي كل الأحلام.
وشرح له أن كل ده واقف على إمضاء حضرتك.. إمضاء واحد بس على جواب .. بطلوع الروح خد الإمضاء وسافر .. سافر على أمريكا وعايزك تشوف وصف دكتور زويل لجامعات بنسلفانيا وكالتك وانبهاره بالمختبرات والبرامج العلمية هناك تعرف ساعتها ليه وازاي زويل بقى زويل.
📌 النجاح محتاج بيئة تساعد الناجح أنه ينجح .. بيئة توفر أدوات النجاح وتدعم الناجح مش تشككه في نفسه.
(اينشتاين لو في أسرة فقيرة بمصر كان حيكون آخره مدرس فيزياء ثانوية عامة عنده سنتر ده قمة النجاح المنتظر هنا)
📌 د. زويل لما سافر شرح الارتباط الوثيق في أمريكا بين مؤسسات الجامعة وبين شركات ومصانع الدولة .. الاتنين بيكملوا بعض، الجامعة بتضخ أفكار وأبحاث بتطور الصناعة بشكل رهيب .. بعكس هنا جامعات جديدة كل سنة بمسميات مختلفة: خاصة/ أهلية/ دولية .. وزي منت شايف كدا كل إنجازات الجامعات دي مصاريف خرافية ياخدوها من أهالي الطلاب. ...كلها هدفها السبوبة مش الاستثمار سواء مستوى الطلاب أو خطة إعداد كوادر ناقصة للدولة.
📌 الجامعة جزء من تركيبة الطالب .. والاقتصاد الناجح جزء تاني، لما تقدم للطالب مجتمع تم تفريغه من عناصره الأساسية متتوقعش الطالب ده يكون هركليز ويحقق المستحيل .. وأيوة شايفك يا اللي مستني الطالب ده يسافر وينجح في الخارج بأدوات الخارج عشان تعمل ساعتها معاه حوار تليفزيوني بعنوان: "مصر تقدر !!
طب حتقولي ايه الحل عايز تشوف ازاي سنغافورة كانت أفقر دول العالم لاغناها ...تجربة ملهمة شوفها ع اليوتيوب
https://youtu.be/qs46HsTuRkI
واللي بيقول الزيادة السكانية هي سبب كل مشاكلنا
ده رد بالتفصيل شوف الفيديو للآخر وقولي رايك
https://youtu.be/vnljkS1w5WA
وكمان شوية مواضيع مهمة وتابع القناة
هل المصري مش بتاع شغل .... رد مهم بالارقام
https://youtu.be/spf3CDoLOqA
قصة فلسطين كاملة بالتفاصيل
https://youtu.be/QQMgwstTuos
تحليل فيلم افاتار وكيف تغزو امريكا العالم ثقافيا ؟
https://youtu.be/09tIlM2Lk_Q
تحليل فيلم البيه البواب وفهم الاقتصاد من خلاله
https://youtu.be/QWLmnOhtaiw
قصة الصين كاملة
https://youtu.be/qNV1O3L4Dgc
توضيح تناسخ الأرواح في الهندوسية والبوذية في مسلسل شيكو
https://youtu.be/L24UaklAMnU
مقارنة بين مصر وفيتنام مهمة جدا بالارقام تفهمك كتير
https://youtu.be/Gp6o-0iOrx0
شكرا لك ❤️❤️🙏🙏
