تقع وسط أغلي منطقة في العالم.
تخيل الجنينة دي لو إتهدت واتعملت كافيهات ومطاعم ، هتكسب دهب ، الأرض هناك بتتباع بالشبر .
ياخي مش عارف ازاي الجماعة بتوع نيويورك غايبة عنهم الفكره دي ، الناس دي اكيد مش بيفهموا في الاستثمار الصح .
يعني ايه يضحوا ب 700 فدان في مدينة زي نيويورك ، علشان قال يخلوها نجيلة وشوية ورد وشجر وكلام فاضي .
الجنينة دي بيزورها 37 مليون شخص سنويا ً، انت متخيل لو عملناها مطاعم وكافيهات هتكسب كام .
ولما سألت واحد فكيك ، طيب وهي نيويورك يعني هتستفيد ايه لما تعمل جنينة زي دي ببلاش كده للناس .
شوف ياخي الرد اللي ينزفر.
قالك قال ايه ، وجود مُتنفس اخضر زي ده ، بيشجع الزوار من كل انحاء امريكا والعالم انهم يستمتعوا بوقتهم فيه ، وده معناه ، مواصلات هتشتغل ، وديلفيري هيشتغل، وحركة تجارة اكتر هتشتغل، كدة كده الناس هتاكل وتشرب، لكن الفرق اننا حافظنا علي المسطح الأخضر وبالتالي الحديقة اخدت سُمعه عالميه .
شوف ياخي التفكير اللي ميقضيش مصلحة.
ومش بس كده ، ده كمان في مدخل الحديقة مسلة مصرية ( مسلة كليوباترا ) والجماعة الامريكان عاملين بالمسلة دي أحلي دعاية للحديقة اللي اصبحت شهرتها عالميه , تخيل ب مسلة واحدة بس وشوية نجيلة جابوا 37 مليون سائح.
اتمني من السيد اللواء محافظ الاسكندرية ، يتصل بالسيد محافظ نيويورك ، ويرسيه علي الليلة ويقوله علي الزتونه في كيفية تحويل الحدائق والمتنزهات العامة , إلي كافيهات ومطاعم ك استثمار مُربح ، ك نوع من أنواع تبادل الخبرات وقصص النجاح بين البلدين الشقيقين ، فلوس داخله معالي الباشا ، سبوبة ولقمة عيش حلوة ، لأن واضح إن عمدة نيوريوك علي قده شويه في موضوع الاستثمار ده ومابيفهمش الدنيا ماشية إزاي.
ولكم جزيل الشكر والعرفان .
