كان يا ما كان .
كان في سبع بنات شاطرين مجتهدين ، موهوبين ، دينا - ياسمين -ناريمان -سارة -حبيبة - نورهان -ياسمينا .
البنات دول من كام سنه ، كانوا شغالين علي تصميم دعايه سياحية لمدينة الاقصر .
نزلت عليهم بنت بالباراشوت اسمها غادة ، قعدت معاهم اسبوعين ومشيت .
البنات كملوا في المشروع ، وفعلا ظهر للنور، لكنه لم يحقق الانتشار .
وبعد سنة ، فوجئ البنات دول ، ب إن التصميم بتاعهم ، تم استخدامه في الافتتاحية السياحيه لطريق الكباش ، منسوب لمين؟
لغادة ، صاحبتهم اللي جت قعدت اسبوعين ومشيت .
غادة طلعت تقول التصميم بتاعي ملكي ، انا اللي رسمته من افكاري ، ومفيش حد إشترك معايا .
وعلشان الافتتاحيه كانت عالميه ، والبنات مش عايزين شوشره تأثر علي الاحتفالية ، ف سكتوا مضطرين .
وأخدت غادة كل النجاح ، وتكريمات، ولقاءات ، وبرامج ، ومؤتمرات ، لدرجة انها القت كلمة مصر في مؤتمر للأمم المتحدة ، وبقي لها شهره عالميه .
وبعد سنه كمان ، الحكومه عايزه تجدد تصميمات محطات المترو ، ف تم اسناد التصميمات الجديده ل مين ؟
ايوه بالظبط ، صاحبة الصيت والشهره .
العبقرينو ، فان جوخ المجره …غاده والي.
وبالفعل قامت غادة بتصميم بعض المحطات ، برسومات ترمز للحضارة الفرعونيه .
ولاقت الرسومات استحسان الجميع .
إلي أن ظهر مصمم رسومات روسي ، أسمه جريجوري ، بيثبت بالأدلة والبراهين ان الرسومات دي بتاعته ، وانها مسروقه منه .
ونزل منشورات في كل المواقع الفنيه العالميه ، بيتهم مصر بسرقة رسوماته ، وبيطالب بالاعتذار والتعويض ، والحاجات دي بره فيها خراب بيوت وتعويضات بالملايين ، ده ممكن يحاسبنا علي إيجار اللوحه باليوم .
طيب أول مره ، البنات الغلابه رضيوا بالأمر الواقع وسكتوا ، ومعرفوش ياخدوا حقهم يا غادة .
لكن عمنا جريجوري هتعملي فيه ايه يا غاده ؟
والتصميمات اللي اتحفرت علي حوائط محطات المترو هنعمل فيها ايه ؟؟
