.............
هيثم عبدالرحمن المراكبي.
هو اللي قدامنا في الصورة ده.
مدرس بقسم النظم والحاسبات في جامعة الأزهر وباحث بمركز دانا فاربر للسرطان بجامعة هارفارد الأمريكية.
هيثم عمل إنجاز ضخم جدا مع فريق أمريكي كان هو الباحث الأول فيه أو القائد بتاعه فعليا وعمليا.
عمل إيه هيثم؟
عمل إنجاز بيحاصر مرض السرطان حرفيا!!
ياعم ده بتاع كمبيوتر وحاسبات ومعلومات زي اللي بنشوفهم عن معهد حاسب الهرم ماله هو بالسرطان بقى؟
هقولك..
عمنا هيثم هو وفريقه اعتمدوا على تقنية الذكاء الاصطناعي وطوروا نموذج حاسوبي جديد بيعتمد في عمله على ما يسميى بآلية التعلم العميق.
دربوا النموذج ده علي جينات ألف مريض سرطان.
النموذج ده أصبح قادر في ثانية واحدة يقول المريض ده السرطان عنده مبكر ولا متقدم بدون بقى تحاليل ولا أشعة ولا التكاليف دي كلها.
طب فايدة ده إيه؟
فايدة ده زي ما دكتور هيثم قال في حديث معايا إنه هيخلي الطبيب المعالج يضع خطته مبكرا وفي حالة السرطان المبكر فالبتالي هيستجيب للعلاجات والنوع المتقدم بيتم وضع خطط تانية له.
بس كده؟
لا مش بس كده.. هيثم وفريقه كمان قدروا يكتشفوا جينات جديدة لم تكن معروفة من قبل بتسبب انتشار سرطان البروستاتا اللي بيصيب الرجال بعد سن الأربعين.
كمان اكتشفوا إن أحد الجينات دي هو السبب في إن سرطان البروستاتا ما بيستجيبش للعلاج، وقاموا بتعديل الجين ده ووقف نشاطه ومن ثم ده هيساعد في وقف انتشار المرض واستجابته للعلاج.
اللي عمله هيثم ورفاقه إنجاز ضخم ومهم جدا للبشرية ومجلة نيتشر العلمية الشهيرة نشرت الإنجاز ده واحتفت به يوم 23 سبتمبر يعني من 4 أيام فقط.
دكتور هيثم المراكبي مش بس عمل إنجاز للبشرية لكنه عمل إنجاز كبير لمصر لأنه باحث مصري قاد فريق أمريكي للإنجاز ده وفي أهم جامعات أمريكا وأصبحوا هناك بيقعدوا يسمعوا لعلمه في محاضراته بإعجاب شديد.
الدكتور هيثم كمان جعل اسم جامعة الأزهر كمشارك رئيسي في الإنجاز ده.. وده طبعا مردوده كبير في تسويق وتحسين صورة الأزهر خارجيا مع صورة مصر والعرب.
هيثم من مواليد قرية بسيطة في الريف المصري هي قرية طبلوها بالمنوفية وكان تلميذ في المعهد الديني بشبين الكوم والتحق بكلية الهندسة بجامعة الأزهر وحصل على الماجستير من جامعة القاهرة بينما الدكتوراة من جامعة فيرجينيا تك بالولايات المتحدة.
