سد النهضة

السيناريوهات المحتملة لتطورات قضية سد النهضة من وجهة نظرى التي لا قيمة لها : 

١ - اصرار اثيوبيا علي القيام بالملئ الثاني .. 

* عشان تعمل كده لازم تجفف الممر الاوسط و تصب خرسانة تخلي ارتفاع الممر يزيد ٣٠ متر .. و عشان يجف لازم تفتح البوابات الجانبية للسد لتصريف ما يقارب من ٥ مليار متر مكعب من مياه تخزين الملىء الاول و ذلك في موعد اقصاه ١ ابريل ٢٠٢١

* طيب لو ده حصل مصر ما قدمهاش حلول غير ضرب جسم السد في الفترة من نهاية شهر ابريل الي بداية شهر مايو 

* هل مصر تمتلك القدرة علي ضرب السد ؟ 

قولا واحدا ايوه .. مصر تمتلك قوات جوية تقدر توصل للسد و تمتلك الذخائر القادرة علي تدمير السد و اللي ظهرت في اخر مناورة للقوات الجوية المصرية ( صاروخ ستورم شادو الشبحي )

* طب هل اثيوبيا تستطيع الدفاع عن السد ضد طائرات الجيل الرابع ++ ؟

قولا واحدا برده لا 

* طيب هل ضرب السد هيأثر علي السودان ؟ 

 لا .. عشان انت منسق مع السودان تنسيق عالي جدا و هتخليه يفضي السدود بتاعته قبل الضربة و اهم السدود دي هو سد الروصيرص  

* طب ايه رد الفعل الاثيوبي المتوقع ؟ 

اثيوبيا بدأت فعلا في الاستعداد لما بعد ضرب السد .. يوم زيارة الرئيس عبد الفتاح السيسي للسودان كان ابي احمد مجتمع برئيس إريتريا و رئيس جنوب السودان و من وجهة نظرى التي لا قيمة لها اعتقد انه بيحشد لحرب برية ضد السودان جنوبا مع دولة جنوب السودان لأن في منطقة متنازع عليها بين الدولتين غنية بالنفط... و في نفس الوقت الحرب دي هتعطل انشاء خط سكة حديد كيب تاون القاهرة التجارى

 و هيكون النزاع شرقا مع اثيوبيا نفسها (اقليم الفشقة ) .. اما دولة اريتريا فهيكون دورها تنشيط عمليات قراصنة البحر الاحمر لتهديد الملاحة البحرية في قناة السويس .. و في المقابل ممكن اريتريا تقتسم اقليم التيجراي مع ابي احمد... و اكيد طبعا القيادة السياسية مش هتستني حد زيي عشان يقولها المعلومات دي ..  

٢ - السيناريو التاني هو ان اثيوبيا لا تقوم بالملىء التاني 

* ما تفتحش البوابات و تسيب الممر الاوسط ما ينشفش و بكده يبقي مش هتعرف تصب الخرسانة و تعلي الممر الاوسط

* في الحالة دي هيبقي الوضع علي ما هو عليه و هيبقي كده السد ما حققش الغرض منه .. بيت وقف يعني 

* طب هل اثيوبيا هتتضرر من الوضع ده ؟

طبعا و هتشتعل الجبهة الداخلية و هيبقي ابي احمد من المغضوب عليهم من الشعب و هتبقي ليلة كبيرة اوي سعادتك 

* بالنسبة لمصر فرصة عظيمة لاستكمال صفقات تسليح احنا في حاجة ليها و تأجيل لمواجهة هتبقي في ظروف صعبة بسبب تداعيات كرونا ...

عموما يوم ١ ابريل هو اليوم الفاصل و اللي هيبين لنا انهي سيناريو هو اللي هيتم