استاذ الجامعة كان بيقول لنا عبد الناصر
من ديكتاتوريته كان مانع كوكاكولا وبيبسي تتباع
في مصر والوطن العربي .. لكنه لم يقول ليه ؟!
بس لما كبرت عرفت قصة "شركة مصر كولا "
اللي رواها وحضرها المهندس عادل الشهاوي
وفي رأيي هى تلخيص لفكر وسياسات وشخصية
جمال عبد الناصر ..
في أواخر الخمسينات قررت الشركة الامريكية لصناعة البيبسي كولا
زيادة المبلغ السنوي مقابل (الخلطة السرية) .." المادة الخام للكولا "
وطالبت هيئة الصناعات الغذائية المصرية بدفع 50 ألف دولار زيادة
المبلغ ده في الوقت ده يبني مصنع ويشغل فيه أكتر من 150 عامل
جمال عبد الناصر لما عرف بالموضوع بعت لرئيس الهيئة
وطلب شرح مفصل للموضوع كله إزاي بيتم وبعد إنتهاء الشرح قال :
- المبلغ ده حرام يقتطع من جيوب المصريين ويروح جيوب الأمريكان
عشان شوية مياة بسكر !! ..
مافيش مهندسين زراعيين في مصر يحللوا المادة دي ويعملوا مشروب بديل ؟
رد سكرتير الهيئة:
- نقدر نصنع مشروب بديل بس محتاجين 6 شهور
فقال عبد الناصر :
تمام .. بلغ الشركة الامريكية اننا مش هندفع المبلغ الزيادة ولا المبلغ السنوي
مافيش بيبسي كولا تاني في مصر .
وفوراً تم تأسيس (شركة القاهرة لتعبئة الزجاجات) وبعد 6 شهور بالتمام
كان في السوق المصري والعربي "مصر كولا" ومش كده وبس
ومشروبات غازية أخري بطعم الليمون والبرتقال بديل للمشروبات الامريكية
بعد فترة تراجع الامريكان عن طلب الزيادة بمبلغ اقل بكتير مقابل استمرار التعاون
ومصر رفضت طلبهم .
القصة دي ماحصلتش مع البيبسي والكولا بس
دي اتكررت في اكتر من صناعة واكتر من موقف مهم
على سبيل المثال و ليس الحصر ..........
لما امريكا طلبت من مصر تقليل صادرتها العالمية من الأرز لتأثيره على الأرز الامريكي
هددت بمنع تصدير القمح لمصر فرفض عبد الناصر تقليل نسبة صادرات مصر من الأرز ،
ولما أتهدد بمنع المعونة الأمريكية لوقف محاولات تصنيع الصواريخ والأسلحة الحربية
فطلع في خطاب رسمي قالهم معونتكم على الجزمة وطالب الشعب بالوقوف بجانبه
واستعاض بالقمح من الاتحاد السوفيتي كبديل مؤقت قبل ما ينجح في 69 في الاكتفاء الذاتي
في كل مرة كان بيقاوم كان بينجح وبيكمل عشان كده كان حلهم الوحيد ضربه في 67
وبرضه مانجحوش في إقاف خططه الاقتصادية والسياسية لحد ما مات سنة 70
وهنا بس كل ما هو كوكاولا غزى مصر من تاني !
وكل ما هو مصر كولا انتهى للأسف !!
السؤال دلوقتي:
كام قصة منتشرة على الفيسبوك مجتزئة غير مكتملة عن عبد الناصر بهدف تشويهه ؟
القصص كتير بس اللي عاوز يعرف الحقيقة هو بس اللي هيصل لها ...!!