( عتاب )
-----------
سجال ثنائي بين
الشاعرة / سامية سيد
الشاعر / أحمد الباز
سامية سيد
********
وقولي ليه بعيد عنى
فتبقى الوحدة هدانى
تروح للشعر وتسيبنى
خلاص الغيرة قتلانى
كلامك كله مش ليه
ياواخد لى الهوى غية
لغيرى بشوق وحنية
وانا فى الحيرة تنسانى
أحمد الباز
********
ازاي عنك انا ابعد
وانتي عمري كياني
وكل قصيده من شعري
بتوصف فيكي عنواني
يا خاطفه القلب من بدري
وشاغله عيوني لو تدري
دا كل لحظه من عمري
عيونك فيها واحشاني
سامية سيد
********
كلام في كلام
بنيت لى قصور من الأحلام
فروحت سكنت انا فيها
وطيرت معاك مع الاوهام
خلقت جناح اطير بيها
تقول انا قيس وانا المجنون
وانا فى العشق ده مفتون
ولما العشق يإسرنى
ويملا الروح ويعبرنى
واقرب ليك فتهجرنى
والاقينى فى كون مركون
أحمد الباز
********
أنا مش قيس
ولا كنت في يوم مجنون
انا عاشق جمال قلبك
انا دايب يا أحلي عيون
انا اللي الحب فاض بيا صبحت اسير
ولاجل عيونك السمره و ليكي أسير
انا اللي عشقت وبقولها صباح مع ليل
بحبك انتي يا اجمل بنات الكون
سامية سيد
********
أقولك ايه
كلامك عمره مابيرسى
ولا له مينا او مرسى
غريب الطبع وبتقسى
ولا شفتك لعشق تصون
واخطى الخطوة مهمومة
واقع مايكونش لى قومة
هاقول لك بس معلومة
كلام تاني ما لهوشى لزوم
أحمد الباز
********
ولو هحلف علي حبك
200 مره و مره كمان
و لا في حد هيصدق
لا إنس مابينا عاش او جان
تعالي وصدقي قلبك
وقلبي قد ما حبك
هيخلص ليكي طول العمر
ويمسح دمعة الأحزان
سامية سيد
********
وتحلف ليه
مانا جربت كام مرة
بتحدفني ايديك لبعيد
وترجع للشبك تاني
تلم الشوق وتاني تعيد
وتبقى الحيرة قتلاني
باقولك ايه منيش قاضي
ولا انت للهوى فاضي
يا تيجي لعندي وتراضي
يا اما أنساك وتنساني
أحمد الباز
********
وأنا راضي
وهاجي لحد باب البيت
وأقدم كل أشواقي
وأقولك عمري ما حبيت
غيرك انتي يا عمري
وأسلم للهوا أمري
ولو شوق الدنيا ما يكفي
راح أحكي حكايتي في الحواديت
سامية سيد
********
بتعرف امتى تحتاجنى
عشان الحيرة بتسوقك
تاخدنى الكلمة وتجبنى
تهنينى بحنين شوقك
وترجع تمشى يا أنانى
ويدبل زهر بستانى
واقولها بصوتى حيانى
وارجع تاني اعيد القول
أحمد الباز
********
إمتي الكذب كان في الحب
بيتصدق ما بين اتنين ...؟
دا لما الحب مس القلب
بيظهر وقتها في العين ...!
وأنا قلبي صحيح حبك
ولا قابل حبيب قبلك
ولو هيطول عليه المشوار
هيفضل جوا ليكي حنين
سامية سيد
********
خلاص الحمل فاق حده
وكتفي هزيل على اده
وانت خيانتك مالهاش حد
طول عمرك تخون العهد
ابعد بقى عن قلبي خلاص
انا مليت مفيش اخلاص
وانا لهفي لإيد عاشقة
تعيد العافية من مده
أحمد الباز
********
إيديا العاشقه ممدوده
لإيدك بس مديها
وحطي اديكي في كفوفي
ولحظة حزنك انسيها
حياتنا الجاية قدمنا
نحقق فيها أحلامنا
ويكبر حبنا بينا
ونعيشها بكل ما فيها
سامية سيد
********
انا مديت في إيدي كتير
لكن الغدر كان طابعك
انا اتعلمت اعيش اساطير
لكني غرقت في بحرك
دة حتى نهاري كان ليلي
و حلمي خلاص خده غيري
وجاي دلوقتي تشكيلي
وتحكي لي عن الأحلام !!!
خلاص ابعد بلاش أوهام
أحمد الباز
********
أنا مقدرش اغيب عنك
نسجت الفرح أنا منك
و لو فكرت يوم ابعد
اتوه عن نفسي وكياني ...
أنا خايف اضيع بعدك
و بيرعبني يوم بعدك
أنا مقدرش اعيش تايه
بعيد عن بيتي و مكاني ...
انا اللي ظلمت قلبك يوم
بإيدي مليت سمايا غيوم
انا اللي قلبي عاش مظلوم
مع إني أنا الجاني ...
سامية سيد
********
حبيبي..
عمري يوم ما أنساك
وكان ردي لرد آساك
انا اللي عشقت
وانا اللي هويت
وانا اللي فضلت عمري معاك
انا شارياك ... انا باهواك
وانا رغم الأسى مسامحاك
أحمد الباز
********
ومين يقدر علي هجرك
مين يقدر ولو ثانيه
يا أطيب قلب في الدنيا
ودايما في العيون ساميه
عشقتك ايوا وبقولها
يا اجمل حب في الدنيا
سامية سيد
********
رجعنا خلاص؟؟
مفيش بينا غير الإخلاص
ولا ثانية نفوِتها
ولا لحظة نموِتها
و يبقى الحب تالتنا
وهانزين جدار بيتنا
ونشرب حب من تاني
ونكتب شعر وأغاني
وهانخلي القمر ونَّاس
أحمد الباز
********
رجعنا خلاص
هنزرع حبنا جنه
ونحضن كل أحلامنا
وتطرح شجرة الاخلاص
تزهر بالورود خدك
ويغير الغصن قدك
يا أجمل حب في الدنيا
إيه أجمل من كدا إحساس ..
سامية سيد
********
تعالى نموت الحرمان
فى كأس الحلم يسعدنا
تعالى نعيش مع الايام
نعيد الحلم ويعيدنا
تعالى نعيشها بالفكرة
ونحلم قد مابنقدر
تعالى نعيش عشان بكرة
يكون بالعشق متقدر
أحمد الباز
********
تعالي نسابق الايام
ونعوض كل ما فاتنا
نحقق اللي كان أحلام
نلون كل أوقاتنا
اتوه م السحر في عيونك
و اقول الشعر في جنونك
ونقضي عمرا الباقي
أنا وانتي يضمنا بيتنا
سامية سيد
********
هاسافر جوة أحلامك
واخليك جوة نن العين
واطير وياك على بيتنا
ونزرع كل ركن حنين
نجيب أولادنا وبناتنا
ونرقيهم من الحاسدين
ونرسم قصة لحياتنا
وتبقى سبيلنا للعاشقين