زى انهاردة من 14 سنة فقدت الملاعب المصرية احد اكثر من انجبتهم احتراما
- فـ لقاء ع قناة المحور بعد بطولة الدورى اللى كسبها الأهلى فـ 2006؛ اللعيبة زملاء اللاعب " محمد عبد الوهاب " زنقوه وطلبوا منه يغنى أغنية ع الهوا .. لما تشوف الفيديو بتاع الجزء ده هتلاقى حرج وتوتر وإرتباك فـ ملامحه وتهدج فـ صوته من المفاجأة وبعدها شوية تفكير كده مخدش أكتر من كام ثانية وبعدها قرار وراح قال : ( أنا هغنى أغنية كذا عشان الحاجة أمى بتحبها ) !
- قبل موته بـ يوم كان قاعد مع خاله فـ بلدهم " سنورس " فـ الفيوم .. خاله سأله : ( مين فينا هيموت الأول ؟ ) .. محمد رد : ( يارب أنا يا خال عشان مش هستحمل أحزن عليك ) .. تانى يوم مباشرة 31 أغسطس 2006 أتوفى محمد ع أرضية ملعب مختار التتش فـ التدريب الصباحى ! .. والدته لها جملة حلوة عن وفاة إبنها لما قالت : ( محمد كان بيموت في الأهلي لغاية ما مات فيه )
- فـ مقابلة والدته فـ برنامج ( الكورة والجماهير ) أتكلمت عنه وقالت إنه كان لما بياخد أى فلوس من الأهلى يجرى عليها ويرميها فـ حجرها ويقول لها : ( خُدى شوفى أنتى عايزة إيه أو أخواتى أو البيت وهاتيه ؛ دى فلوسك إنتى مش أنا ) .. حتى فـ المرة الوحيدة اللى جاب لها فلوس أقل من اللى متعود يجيبهالها هى أستغربت بس مارضيتش تسأله عنها ما هى كده كده فلوسه وهو حر فيها؛ بس بعد وفاته فيه صديق له جه لوالدته وقال لها إنه كان اتبرع بجهاز غسيل كلوى لمستشفى بدون ما يقول لحد فـ والدته فهمت إن هى دى الفلوس اللى هو كان شالها !
- استغربت لما عرفت إن31 اغسطس انهاردة وافق الذكرى الرابعة عشر ع وفاة اللاعب ( محمد عبد الوهاب ) ! .. فات 14سنة ! .. تستغرب أكتر لما تعرف إنه مات وهو عنده 23 سنة .. الفترة اللى اتعرف فيها كانت سنة ونصف فقط لا غير ؛ بس قدر يكسب فيها حب الناس كلها وحقق فيهم 10 بطولات منها 7 بطولات مع الأهلى وثلاث بطولات مع المنتخبات .. فيه ناس بتعيش قده 3 مرات ومش بيعملوا ربع اللى عمله .. " محمد " مثال للشخص اللى مش بيحسبها وبيسيب مركب حياته ع أقدار ولطف الله .. لعيب كورة مجتهد مركز فـ شغله .. مؤدب .. لا عمرنا شوفناه بيشّوح لـ حكم ولا بيعترض ع قرار ولابيمثل عشان ياخد ضربة جزاء ولا حتى خد إنذار .. شارى رضا وخاطر أمه للآخر وبالتالى كان لازم يكون الثمن حب الناس له فـ الدنيا ورضا ربنا عنه فـ الدنيا وإن شاء الله فى الآخرة وسيل دعوات مش بيقف ع مدار 14 سنه كاملين لما حد بيفتكره .. ما شوفتش كمية زعل مـ كل اللى ليهم فـ الكورة أو ملهمش زى ما حصل يوم وفاة " محمد " .. الإنسان مننا بيموت واللى بيفضل بعده هى السيرة يا حلوة يا وحشة ..
أنا زمالكاوى وبحب " محمد عبد الوهاب " .. ربنا يرحمك يا محمد ويجعل لنا نصيب من سيرتك الحلوة بعد الموت