تعريف الدولة في الكتب والعلوم انها اقليم أو (أرض)، وشعب، وسلطة … وسيادة، واعتراف من دول تانية.
يعني لو مفيش أرض.. يبقى مفيش دولة.
ولو مفيش شعب.. برضه مفيش دولة.
وموضوع السلطة كذلك من المقومات الاساسية الدولة، يعني ما لو مفيش سلطة أو حكومة بتحكم الدولة وتدير الأمور وتمثل الدولة.. يبقى مش دولة
وبالنسبة موضوع السيادة والاعتراف .. ممكن تلاقي دول منقوصة السيادة، وبرضه بنلاقي دول معترف بيها من بعض الدول وغير معترف بها من كل الدول.
لكن الاساس هو (أرض وشعب وسلطة).
إذاً الشعب من المقومات الرئيسية لمفهوم الدولة. الناس والبشر اللي عايشين على هذه الارض.
والسلطة من مقومات الدولة.. بس مش هي الدولة..
السلطة هي مجموعة المؤسسات اللي بتدير الدولة، والأفراد اللي بتدير المؤسسات اللي بتدير الدولة.
والشعب بينتظم في جماعات، جمعيات.. نقابات.. روابط، ائتلافات .. مبادرات .. قبايل، عصبيات، أحزاب، واشكال كتير بينتظم فيها المجتمع.
لكن في مصر بنلاقي كل شوية واحد طالع يزعق ويبرق ويقولك اللي مش هايسمع الكلام يبقى ضد الدولة،
واللي مش عاجبه يبقى عدو للدولة.
غالبا اللي بيزعق ده بيبقى حد من السلطة في منصب تنفيذي أيا كان موقعه .. أو حد موالي للسلطة بشكل عام. أو نائب برلماني من أحزاب الموالاة.. أو إعلامي مؤيد.. أو أي حد بيحب يجامل.
وغالبا هتلاقيه بينطقها كده: الدااولة… علشان يخوفنا يعني😎.
مع إن الدولة باقية، والسلطة والحكومات والقوانين بتروح وتيجي.
يعني الملك فاروق مشي وتم الإطاحة بأعوانه وكمان اللي مش أعوانه .. لكن بقيت الدولة.
عبدالناصر بعد هزيمة ١٩٦٧ عمل زي مفرمة كده وحبس ناس ريحتها فاحت كانت ماسكة أهم حاجات في الدولة.. لكن بقيت الدولة.
عبدالناصر اللي كانوا بيعتبروه نصف اله، هو نفسه مات وبقيت الدولة.
السادات أطاح بأذرع عبدالناصر ومراكز القوى اللي كانوا مسيطرين على كل حاجة في الدولة.. وبقيت الدولة.
دساتير وقوانين اتغيرت واتعدلت وبقيت الدولة.
مبارك قعد ٣٠ سنة يغير حكومات ويجيب ناس ويمشي ناس.. وشوية يمين وشوية شمال.. وبقيت الدولة.
ثورة يناير والدنيا عطلت لفترة والعالم كله قعد يتفرج، وبدأت مرحلة مش مفهومة ومش مستقرة ، وجه مرسي ومشي مرسي.. وبقيت الدولة.
فكرة الخلط بين الدولة والأشخاص هو خداع ونصب على الناس.
معارضة الاشخاص أو المسئولين أيا كانت درجاتهم مش هدم للدولة ولا مواجهة لها.
بالعكس. كتير بيكون اللي بيعارضوا هدفهم الأساسي هو النصيحة والصالح العام.. وهدفهم من المعارضة هو إنقاذ الدولة من إنها تصبح لا دولة.
والدولة اللي بتسمح بالتنوع والانتقاد للسلطة والاختلاف في الافكار والأخذ والرد .. هي اللي تعتبر دولة قوية مش العكس.
وكمان الدولة الأقوى هي اللي فيها المجتمع المدني أقوى بكل تنوعاته وأشكاله.
#مصر #نقابة_الاطباء #قانون_المسئولية_الطبية #قانون_الاجراءات_الجنائية
